خوات بن جبير الانصاري

Mood: Tired

Listening to: ×××
Reading: ×××
Watching: ×××
Playing: ×××
Eating: Cheetos

Drinking: Chocolate milk

دوبي جايه من ميجا مول .. كان فيه محاضرة للعوضي و العفاسي و احمد الشقيري ..
المحاضرة كانت اميزنق .. العفاسي ماحبيتو كل شويا بينشد و كلها بلاي باك .. الدكتور العوضي كلامو رائع هادي تالت مره احضرلو .. من اسبوعين حضرتلوا في روشان مول كانت الحفله الافتاتحيه لثابت على قيمي و كان معاه الجبيلان و بعدها بكم يوم عملوها في ميجا مول برضو و كان معاه الجسيس فيصل اللبًان ..

وحده من الحاجات الطريفه الي صارت اليوم .. انو احمد الشيقيري جا لابس جينز و مره شكلو كاجول .. و اليوم جا الامير عمرو الفيصل و المهندس حمزه الصيرفي عشان كمان بيفتتحو معرض لفلسطين .. فقبل مايتكلم الشيقيري صار يقول اعذروني انا قالولي مول فجيت كاجول ماكنت اعرف ان الموضوع رسمي كدا .. وبعدها حكى لما كان في الكويت من شهر و كان بيقول انو انا دايمن اقول انا لاني شيخ و لا مفتي و لا داعيه انا واحد بحكي الي اتعلمتو .. يقول تاني يوم الجرائد الكويته كااتبه الشيخ العلامه احمد الشيقيري ,, شويا كدا الا العوضي و هوا بيتكلم بيقول و الشيخ الشيقيري قام احمد الشقيري وجهو قلب..

اني واي .. وحده من الاشياء الحلوه الي احسها وحده من احلى الاشياء الي سمعتها من بداية حملة ثابت على قيمي قصة لشخص اسمو خوات بن جبير ..

مين خوات بن جبير الانصاري دا !

هادا واحد كان معروف في ايام الجاهلية انو على قولتنا " حق بنات " و كان مررره وسيم و انيق .. و كانت حكاويه مع النساء تتناقل بين العرب .. من اشهر الحكاوي انو مره كان في سوق و كان في امرأة جميلة بتبيع سمن فسألها هل عندك سمن ؟ قالتوا ايوا .. وفكت وحده من القرب و داق السمن و قالها لا ماعجبني و اداها هوا تمسكها بيدها طبعا ماحتقدر تفك يدها لان لو فكتها حينكب السمن .. و فك واحد تاني و داقو و شويا صار يتلفت و قالها امسكيه فقد شرد جملي فقالتلو ويحك حتى اربط الذي بيدي .. قام قالها امسكيه والا اسقطتو على الارض فقد شرد جملي .. طبعا المرأة اضطرت تمسكو بيدها التانيه فصارت يداتها الاتنين مشغولتيين بمسك القربتيين .. راح انتهز الفرصه و قبلها !!

طبعا القصه دي انتشرت عند العرب .. خوات دا اسلم بعدين و من الناس الي يكتبوا عنهم في الكتب اسلم و "احسن اسلامو ".. طبعا كتير

نقرا ان الشخص اسلم بس مو كتير نلقاهم كاتبيين و احسن اسلامو ..

المهم بعد مااسلم .. مره كان في سفر مع الرسول صلى الله عليه و سلم .. و خيمو في الظهران " دا وادي قرب مكه " فخرج من خيمتو وشاف نسوة بيتكلموا مع بعض و عجبوه فرجع الخيمه تاني و خرج من شنطتو "حلة" ليلبسها و يتجمل وخرجلهم و قعد معاهم "يعني راح اتأنتك و اتشيكلهم" .. و خرج الرسول صلى الله عليه و سلم و شافو فقالو: ياعبد الله مااجلسك اليهن ؟

طبعاً ايش منظرك لو قاعد مع بنات و يشوفك النبي !!! موقف سخيف جداً

طبعا خوات خاف و صار يبغا اي حجه يقولها للرسول قام قال: ان لي جمل شرد و انا ابتغي له قيدا .. نفس الحجه القديمه لوول
طبعا الرسول مايمشي عليه الكلام دا , و بعدها راحوا يكملوا الطريق عشان يرجعوا للمدينه و صار الرسول كل مايشوف خوات يقولو: يا عبد الله ما فعل شراد جملك؟
خوات استعجل ووصل المدينة و تجنب المسجد و القعدة مع الرسول صلى الله عليه و سلم بالعربي كدا مستحي يحط عينو في عين الرسول بعد الي صار, و مره انتهز فرصة انه مافي احد في المسجد وراح يصلي و جالوا النبي و صلى ركعتين خفيفتين و جلس .. وخوات صار يطول في الصلاة عشان يخاف يجابه الرسول و يسألوا ماذا فعلت في شراد جملك .. بس الرسول قعد يستناه يخلص صلاة و خوات لسه بيصلي الا يسمع الرسول

يقولو: طول أبا عبد الله ما شئت؛ فلست قائما حتى تنصرف

طبعا وقتها خوات قرر يعتذر للرسول فخلص صلاتو , فقالو الرسول:السلام عليك يا أبا عبد الله مافعل شراد ذلك الجمل؟, فقال خوات: يا رسول الله والذى بعثك بالحق ما شرد ذلك الجمل منذ أسلمت قصدو انو ماقد سوى الحركة هادي من يوم يوم مااسلم , فقالو الرسول: رحمك الله.

و من يومها الرسول ماعادلوا جملة ماذا فعلت في شراد جملك

البوينت الي نبغا نوصلوا من دي القصه كلها , انو شوفوا كيف النبي بس قال جملة وحده و كررها كم مرة و هو استحى و حتى المسجد ما صار يروحو عشان مستحي يواجه الرسول, في زمنا دا نسوي المعصيه و نقول انا سويت بكل كبر و فخر و مين قدي.

مررره ماصار فينا حياء

اني واي .. تومورو في محاضرة تانيه للعوضي و العفاسي في روشان مول الساعه 9 الليل

نشوفكوم هونيك

سي يا