تحركي خطوة يا نصف عاشقة !!

واتس رونق وذ مي !!!!

وحدة من عاداتي "السخيفة " اني اقطم اضافري و شفايفي .. طب ازا خلصت عليهوم اعمل ايه ؟؟؟ ابداء االعب باضافير رجلي .. و امس بالغلط و ماعرف كيف صارت و انا بسحب ظفر رجلي بحسو تقيل .. اطالع القى نفسي قاعدة اسحب الضفر كلو من مكانو .. لحسن الحظ ان انتبهت بدري و ماشديت الا شي بسيط .. بس طبعاً و كعادتي البايخة احب اسوي لكل شي نهاية مأسوية " باي ذا واي الموت عندي مو نهاية مأساوية بالعكس دا انا بعتبروا راحة ابدية " المهم انا شفت المنظر من هنا و جاتني شوك .. مددت رجولي الاتين على الكرسي " زي الي اتكسرت رجولهم الله لا يقدر " و صرت كدا

O.O

و ابغا ابكي و انا من النوع الي لما انصدم مايصير عندي ردة فعل .. جيجي صارت تطالع فيا تسمع صوت بس مهي عارفة انا
ببكي و لا بستهبل و لا ايش .. و تطالع و تقولي ايشبك !! اقولها رجولي رجولي شوفي ايش صار و تطالع في رجلي و فوق راسها ستين علامة تعجب تقولي يابنتي مافي شي .. و انا الا في شي و اشتغلت وقتها .. دحين رجولي مكشوفة وحتلتهب و حيدخلها مويه .. تقولي من فين حيدخلها مويه اقولها لما امشي .. و هيا تطلعلها ستين علامة استفهام اخرى ,, و تقولي يابنت عادي مافيكي شي انتي طول عمرك تكبري المواضيع و انا الا و مصرة انو لازم اروح المستشفى و اتخيلت الدراما الي حتصير هناك و انه الي في الطوارئ كلهم حيتلموا عليا و حيلفولي صوباعي و ماحعرف امشي بسبب اللفة و لازم كل فترة اروحلهم يغيرولي اللفة و كيف اروح الجامعة !!! و الوضوء !!! .. و من الصدمة نمت لاني ماكنت عارفة ايش اسوي و بعد ماصحيت رحت المسشفى .. و ياريتني مارحت حسسوني من جد اني بكبر المواضيع ..

Part 1 . . .
نانا و الدكتور

نانا اول ماشافت الدكتور : دكتور انا سحبت ظفري بالغلط و صار مكشوف و خايفة يلتهب
الدكتور : و ريني اشوف
نانا " واقفة على رجل وحدة عشان توري الدكتور و يدوب تتوازن " : اهو شوف كيف الضفر
الدكتور : !!
الدكتور مرة اخرى: اية ضفر
نانا : هادا الي في الوسط .. هوا ماطلع الضفر كلو انا بس سحبت جزء يعني لو رفعتوا حيبان انو طالع بس انا ماابغا افصلوا عشان خايفة انو يكون التحم و ارجع افصلوا تاني
الدكتور : لالا عادي مافي شي
نانا : انتا اشبك دا مكشوف مع المشي حيلتهب و ممكن يجيني
غرغرينا
شوفوا وصلتها لايش بس
الدكتور : خلاص حخليهم يلفولك هيا " بيسكتني "
بس على مين هع
نانا : طب ماراح يلتهب مع اللف
انتي ارسيلك على بر لا كدا عاجبك و لا كدا عاجبك
الدكتور : خلاص انا حديكي مضاد حيوي زي الجل كدا عشان لا تلتهب
نانا : يعني مايخوف
الدكتور : مشي و حولها لدكتورة

Part 2 . . .
نانا و الدكتورة

الدكتورة : شو عندك
نانا : سحبت ضفري بالغلط لحظة اوريكي
نانا تقوم من الكرسي و تدخل للدكتورة ورا المكتب
الدكتورة تطالع في نانا و هيا واقفة على رجل وحدة اقين تشرح للدكتور .. و لما استعصى الموضوع عليا رحت اشرحلها هوا على اصباع يدي الدكتورة تأشر لنانا تروح " تنطق " في الكرسي و تقول : لا ما في اشي بيأسر و لازم تضل مكشوفة بس انتي لا ترطبي المنطقة نانا : ماحتلتهب لانها مكشوفة
الدكتورة : لا و حكتبلك مرهم عشان لا يلتهب
نانا : طب ايش احسن البس شبشب و لا جزمة مقفلة
" كأنو دوبها قالت خليه مكشوف و كأنوا السؤال مالو داعي اصلا "
الدكتورة : لا مكشوفة .. ازا بدك تلبسي جزمة مقفولة البسي بس ماتكون ديئة كتيير و البسي شرابات بيضة نانا
لوهلة كانت حتسألها ليش بيضا ملون ماينفع بس خافت تاخدلها رفسة او شي
نانا : طب ايش الاحسن شوز مكشوفة و لا مقفلة لانو عندي كلو
!!!!!!!!!
الدكتورة : اي شي بس لو مقفلة البسي شرابات بيضا
و عينها تقولي اخرسي خلاص و خدي الروشتا و اسكتي
نانا : المرهم كم مرة استخدمو
الدكتورة : من تلات الى اربع مرات
نانا : لكم يوم
الدكتورة : اسبوع و عينها تقول اطلعي برا
نانا يخطر في بالها سؤال خطير " اسألها ايش احسن البس بكرا في الجامعة تنورة و لا بنطلون عشان رجلي " .. بس كالسؤال السابق سكتت عشان لا يترمي شي في وجهي
نانا اخدت الروشة و تروح تصرفها و هيا في الطريق تفتكر سؤال و ترجع للدكتور ..
طق طق .. افتح الباب .. الدكتورة بتلم اغراضها تبغا تمشي و نانا تطرح عليها السؤال الفظييييع
المرهم ادهنوا فوق الضفر و لا تحت الضفر ؟؟؟
الدكتورة : طالعت فيا بنظره فتاكة و قالتلي فوق
و صايرة امشي و رافعة اصابع رجلي .. لما رجعت البيت طبعا شفت كل اشكال التريقة عشان الموضع مافيلو شي و انا مكبرتو ,, فسكتت لاني حسيت اني غلط و ابغا ابطل العادة دي ,, و لما جيت احط الكريم تررراااااررررااااا خطر في بالي السؤال الفلتة الي فاتني احم احم . . نسيت اسألها احط من المهرم قد ايش !!
لما حكيت صحباتي اليوم ف الجامعة وحدة منهم علطول قالتلي و طبعا انتي موناقصك شي علطول كبرتي الموضوع .. و انا في نفسي قولت اوه ماي قاد دا الكل لاحظ !!!!!! طبعا وقتها حسيت انو ايش دا !!!!!!! انا مرررره اكبر المواضيع .. و افتكرت البلاوي السابقة الي علملتها مره رحت للدكتور اقولو عندي القلب ,, و مرة اقولهم عندي شي في الكلى !!من جد من جد انا لازم ابطل العادة دي مررررره طبع مو حلو ..
تقريبا في نفس دا الوقت امس انا كنت بعمل العبط الي فوق دا

ما يستفاد من القصة :
تتبغوا تتسلوا ابعدوا عن اضافركوم بلييييز
جيجي ممكن تقول كلام صح احيانا حنضرب
كاظم الساهر محدش بيطفش منو